السلام عليكم جميعا
اتمنى ياجماعة الخير تاخذون الحيطة والحذر عند استخدام اي جهاز صرف آلي في العالم خصوصا في اوروبا..
حصلت لي قصة العام الماضي ..
كنت توني واصل اسبانيا , وقبل ما اوصل للفندق وقفت وسحبت من جهاز صراف آلي وليتني ماسحبت
المهم , يوم طلعت من غرفة السحب لحقني واحد اسباني وماسك بيده 20 يورو يقوللي طاحت منك !!
قلت له كييييف؟؟
فال لأنك يوم خلصت من عملية السحب ما ضغطت على زر الالغاء!!
قلتله وش دخل هذا بهذا؟
قاللي ان هنا بأسبانيا الصرافات اذا ما حطيت زر الالغاء يقدر يجي اي واحد بعدك ويسحب من حسابك زي ما يبي!!
وقاللي دخل بطاقتك وحط الغاء.. انا قلت طيب.. طبعا الرجال وانا احط الرقم السري ناشب وقالط معي قلطه اليمه.. قلت في نفسي خله يشوف الرقم اصلا مايقدر يسوي شي لأن البطاقه معي..
المهم مرت الايام وبعد شهر تقريبا جيت اشيك على الحساب لقيت الرصيد مسحوب كله!!
الطامه ان الرصيد كان فيه مبلغ محترم مجمعه.. كلمت البنك وقلتلهم وقفوا الحساب وطبعت الكشف لقيت كلها سحوبات من صراف آلي على مدار 36 يوم !!
البنك في البدايه قاللي ماعندنا لك شي انت نصاب!!
قلتلهم ياجماعة الخير كل السحوبات قاعده تصير من باريس وانا كنت بين اسبانيا والرياض , كيف يعني.
قالوا عادي انت معطي احد بطاقتك .. قلتلهم البطاقه معي فسروا لي اللي حصل.. هذا اختراق قوي للحساب..
ماعطوني وجه
عاد رحت انا لواحد ذيب يشتغل بنفس البنك في قسم البطاقات , وتزهل الله يعافيه , واكتشفنا اللي صار.
الجهاز اللي استخدمته باسبانيا كان فيه ناسخ للشريط الممغنط لأي بطاقه صراف تدخل فيه.. ويلزق المنسوخ على بطاقه ثانيه.. ولازم يكون معاه الرقم السري.. عشان كذا هو ناداني واستدرجني عشان يشوفني وانا احط الرقم السري..
قاللي الرجال , ان لايمكن لأي احد ان يسوي هكر على حسابي بنفس الطريقه اذا هو مامعاه الرقم السري حقي..
وقالي بعض الصرافات يصير فيها كاميرا صغيره جدا تكون مزروعة فوق الصراف عشان تشوف الرقم السري.. وقطعة الناسخ للشريط الممغنط تكون مزروعة داخل مكان ادخال البطاقات.. ونبهني اني اذا جيت اسوي اي عملية بالصراف لازم اغطي يدي اذا جيت ادخل الرقم السري .. وبديت اسوي هالحركة حتى هنا بالسعوديه..
طبعا البنك رفض انه يعوضني , وقدمت خطاب رسمي لمؤسسة النقد وماجاني رد الى الآن
الرئيسية 
أحدث الصور 
التسجيل 
دخول 
الخميس أكتوبر 09, 2008 5:59 pm
